جیمز اینڈرسن نے سرے کاؤنٹی سے معاہدہ کر لیا

انگلینڈ کے مایہ ناز فاسٹ بولر جیمز اینڈرسن نے کرکٹ کو خیرباد کہنے کے بجائے اپنے کیریئر کو مزید آگے بڑھانے کا فیصلہ کیا ہے۔ انہوں نے 2027 کے سیزن کے لیے سرے کاؤنٹی سے معاہدہ کر لیا ہے۔ اس طرح وہ کم از کم ایک اور سیزن تک پیشہ ورانہ کرکٹ کھیلتے رہیں گے۔

انگلینڈ کی جانب سے ٹیسٹ کرکٹ میں سب سے زیادہ وکٹیں حاصل کرنے والے جیمز اینڈرسن کو 2026 کے سیزن کے اختتام پر ان کی سابقہ کاؤنٹی لنکاشائر نے فارغ کر دیا تھا۔ تاہم 44 سالہ فاسٹ بولر نے کھیل جاری رکھنے کا فیصلہ کیا اور اب وہ اوول کے میدان میں سرے کی نمائندگی کرتے نظر آئیں گے۔

سرے کاؤنٹی میں شمولیت کے اعلان کے بعد جمعرات کو جیمز اینڈرسن نے خوشی کا اظہار کرتے ہوئے کہا کہ سرے جیسے بڑے کلب کا حصہ بننا ان کے لیے اعزاز کی بات ہے اور وہ اپنے کیریئر کے اس نئے مرحلے کا آغاز کرنے کے منتظر ہیں۔

ان کا کہنا تھا کہ انہیں اب بھی محسوس ہوتا ہے کہ وہ ٹیم کے لیے بہت کچھ کر سکتے ہیں۔ وہ وکٹیں حاصل کرنے کے ساتھ ٹیم کو میچ جتوانے میں بھی اپنا کردار ادا کرنا چاہتے ہیں۔ اس کے علاوہ وہ میدان سے باہر بھی کھلاڑیوں کی مدد کرنا چاہتے ہیں، خاص طور پر نوجوان کرکٹرز کی صلاحیتوں کو بہتر بنانے اور انہیں اپنے ملک کی نمائندگی کے قابل بنانے میں اپنا تجربہ استعمال کرنا چاہتے ہیں۔

جیمز اینڈرسن کی قیادت میں لنکاشائر نے گزشتہ سیزن کاؤنٹی چیمپئن شپ میں دوسری آخری پوزیشن حاصل کی تھی۔ تاہم انفرادی طور پر اینڈرسن کی کارکردگی شاندار رہی۔ انہوں نے 11 میچوں میں 50 وکٹیں حاصل کیں اور ان کی فی وکٹ اوسط صرف 17.68 رہی۔

اس کے باوجود لنکاشائر کے نئے ڈائریکٹر کرکٹ پال فاربریس اور چیف ایگزیکٹو رچرڈ کینیون نے گزشتہ ہفتے ایک ملاقات میں اینڈرسن کو آگاہ کیا کہ 2027 کے سیزن کے لیے ان کے معاہدے میں توسیع نہیں کی جائے گی۔

لنکاشائر کا یہ فیصلہ دو سال قبل انگلینڈ کی جانب سے اینڈرسن کے ٹیسٹ کیریئر کے اختتام کی یاد دلاتا ہے۔ اس وقت کرکٹ ڈائریکٹر روب کی، ہیڈ کوچ برینڈن میک کولم اور کپتان بین اسٹوکس نے تجربہ کار فاسٹ بولر کے بجائے مستقبل کی ٹیم تیار کرنے کا ارادہ ظاہر کیا تھا، جس کے بعد انہیں بین الاقوامی کرکٹ سے ریٹائر ہونا پڑا تھا۔

جیمز اینڈرسن نے ٹیسٹ کرکٹ سے 704 وکٹوں کے ساتھ رخصت لی۔ وہ پانچ روزہ کرکٹ میں سب سے زیادہ وکٹیں حاصل کرنے والے فاسٹ بولر ہیں۔ اب سرے کے ساتھ معاہدے کے بعد ان کے شاندار کرکٹ کیریئر میں ایک اور باب کا اضافہ ہو گیا ہے۔

مزید پڑھیں: پاکستان نے بنگلہ دیش کو 8 وکٹوں سے شکست دے دی